EXTRAESCOLARES 2016-2017  

Xoves, 15 de setembro de 2015

Desde hoxe é posible a través do formulario de inscrición anotarse nas extraescolares para este curso. Lembrade que os formularios se deben entregar na secretaría do centro (que rexistrará a entrega) ou ao correo inscricions@anpacastrobaxoi.gal. O prazo de inscrición remata o 23 de setembro aos efectos de fixar as actividades que poden iniciar (as que acaden un número mínimo de participantes.

Consulta toda a oferta e horarios na sección Actividades->Extraescolares.

ABERTO O PRAZO MATRÍCULA PARA OS SERVIZOS DE COMEDOR E MAÑANCEIROS 

Luns, 7 de setembro de 2016

Co comezo do curso escolar 2016/2017, comezan tamén a funcionar tamén os servizos de comedor  e mañanceiros. 

O prazo de inscrición para os alumnos que comezan o 12.09.2016 a empregar o servizo remata o 08.09.2016.

A ANPA do CPI Castro Baxoi de Miño xestiona o comedor escolar do Castro Baxoi, en colaboración coa Federación Provincial de Anpas de Centros Públicos da provincia da Coruña e a empresa Jardanay S.L. O Concello de Miño convoca en cada curso axudas para a asistencia ao comedor, que concede segundo criterios socio-económicos (para este ano o anuncio de aprobación das bases é do 05.09.2016 - máis información na Oficina de Servizos Sociais do Concello). Consulta toda a información na sección de Actividades->Comedor.

Mañanceiros é un servizo de conciliación que organiza a ANPA en colaboración coa empresa Alicerce Eventos S.L. Xa se pode facer a reserva de praza paranote a actividade de Mañanceiros para o curso 2016-2017. Consulta toda a información na sección de Actividades->Mañanceiros.

Como novidade para o curso escolar 2016/2017, por decisión da Xunta Directiva, os servizos de comedor e mañanceiros comparten seguro de accidentes que as familias aboarán, nun pagamento único de 5 €.

PROPOSTA EXTRAESCOLARES 2016-2017 

Luns, 5 de setembro de 2015

Próximamente publicaremos a proposta de actividades extraescolares para o curso 2016/2017.

ABERTO O PRAZO MATRÍCULA PARA O SERVIZO DE MAÑANCEIROS 

Luns, 5 de setembro de 2016

Co comezo do curso escolar 2016/2017, comeza a funcionar tamén o servizo de Mañanceiros que organiza a ANPA en colaboración coa empresa Alicerce Eventos S.L. Xa se pode facer a reserva de praza para a actividade de Mañanceiros para o curso 2016-2017. Consulta toda a información na sección de Actividades->Mañanceiros.

ABERTO O PRAZO MATRÍCULA PARA O SERVIZO DE MAÑANCEIROS 

Luns, 5 de setembro de 2016

Xa se pode facer a reserva de praza para a actividade de Mañanceiros para o curso 2016-2017. Consulta toda a información na sección de Actividades->Mañanceiros.

22 de XUÑO - FESTA DE FIN DE CURSO 2016

Xoves, 16 de xuño de 2016

Presentamos o programa definitivo para a Festa de fin de curso que terá lugar, de 16.30 h. a 19.30 h.  nas instalacións do CPI Castro Baxoi, a tarde do día 22.06.2016.

Para acceder ao centro os menores deberán acudir acompañados dun adulto ou ter presentada a correspondente autorización por escrito (a partir de 5º de Primaria). A documentación con toda a información e o modelo de autorización enviarase nas mochilas do alumnado nos vindeiros días.

Agradecemos o apoio das entidades colaboradoras para a realización da festa (CPI Castro Baxoi, Concello de Miño, Vázquez y Garzón S.L.)

Contamos con vós para pasar unha tarde diferente como peche do curso. NON FALTEDES!!! 

a anpa manterá o servizo de comedor e mañanceiros ata o último día de curso

Luns, 6 de xuño de 2016

Lembramos a todas as familias usuarias de mañanceiros e comedor que poderán empregar ámbolos dous servizos ata o último día de clase deste curso escolar, é dicir, o 22.06.2016 (incluído). Recordamos tamén que, ante calquera incidencia no funcionamento do servizo, teñen á súa disposición o teléfono da asociación: 682 321 886 (se por razóns de servizo ou cobertura o teléfono estivese fóra de servizo deberán agardar ao remate da locución do contestador para poder contactar con algún membro da asociación).

XORNADA DE PORTAS ABERTAS E PECHE DAS ACTIVIDADES EXTRAESCOLARES

Luns, 6 de xuño de 2016

Como novidade para este curso, a Anpa organiza unha xornada de portas abertas, que servirá tamén de peche para cada unha das actividades extraescolares que desenvolve no noso centro. Convidamos a todas as familias a acompañar e participar activamente na xornada acompañando aos rapaces ao longo da actividade.

O calendario é o seguinte:

actividade/data	luns 13.06	martes 14.06	mércores 15.06	xoves 16.06	venres 17.06
Xadrez	de 16 a 18 h.
Judo				de 16 a 17 h.
Zumba		de 17a 18 h., no Pavillón
Artes plásticas				de 16 a 18 h.
Baloncesto					de 16 a 17 h.

Lembramos tamén que a semana do 13.06.2016 ao 17.06.2016, é a última semana de actividades extraescolares.

O GRUPO DE JUDO PREMIADO NA EDICIÓN 28 DO TROFEO MIGUELITO

Luns, 31 de maio de 2016

Cun total de 84000 participantes ao longo das súas 28 edicións, o trofeo Miguelito, que tivo lugar no Coliseum da Coruña o pasado domingo 29, foi unha cita destacada para os judokas do CPI Castro Baxoi de Miño. Os bos resultados acadados en xeral, nesta actividade que organiza a ANPA, nos traballos de caídas, técnicas en pé e defensa persoal, fixeron merecedor ao grupo e aos seus mestresdun dos "premios á técnica" que a organización repartía nesta edición. Ao remate, unha das parellas, a formada por Daniela C. e Teo A., que obtivera previamente a calificación de excelente en todas as técnicas desenvolvidas, tivo a oportunidade de facer a súa exhibición no tatami central.

Unha organización impecable e, o mellor premio, o soriso das nosas nenas e nenos ao rematar.

Excursión en familia - sábado 4 de xuño

Sábado, 21 de maio de 2016

A Anpa do Castro Baxoi de Miño organiza e cofinancia unha excursión en familia para o sábado 4 de xuño. Para a xornada programouse un amplo abano de actividades culturales e de lecer pensadas para disfrutar dun día  divertido e diferente en familia, en comunidade e a un prezo axeitado. 

Dirixido a: familias do CPI Castro Baxoi (Nais, pais, escolares, profesorado ou persoal non docente. Familias de entidades colaboradoras coa Anpa.

Datas: Das 9.30 h. ás 21.00 h. do sábado 4 de xuño .

Lugares: Fragas do Eume e a súa contorna.

Inscricións: aberta a ta o venres 27 de maio;  Apúntate en inscricions@anpacastro baxoi.gal

AVALICIACIÓNS DE 3º E 6º DE PRIMARIA: COMUNICADO DA PLATAFORMA EN DEFENSA DO ENSINO PÚBLICO DE GALICIA

Sábado, 7 de maio de 2016

Publicamos o comunicado da Plataforma en Defensa do Ensino Público de Galicia que resume os puntos polos que a Federación Provincial de ANPAs  da Coruña, á que pertence e coa que está aliñada a nosa asociación, rexeita as probas de avaliación da LOMCE. 

NENOOS WEEK - XORNADA DE PORTAS ABERTAS

Domingo, 1 de maio de 2016

Os días 24 e 25 de maio está prevista  a "Nenoos Week"  - xornada de portas abertas. A xornada vai dirixida ás familias con alumnos inscritos nesta actividade que poderán participar e compartir un día de de clase cos seus fillos e observar a súa evolución. 

COMUNICADO DA PLATAFORMA
EN DEFENSA DO ENSINO PÚBLICO

Abril de 2016

 

PROGRAMA DE ACTIVIDADES PARA NEN@S, PAIS, NAIS E PROFESORADO

Venres, 11 de marzo de 2016

Desde a ANPA do CPI Castro Baxoi presentamos unha proposta de actividades dirixidas ás familias e a todas as persoas que forman a Comunidade Educativa, co obxectivo de facilitar aos pais, nais e profesores, información e ferramentas que orienten na educación dos nosos fill@s. 

No seguinte tríptico informativo atoparedes toda a información sobre a programación dos talleres, temporización, prazos de inscrición, prezos, etc.

Descarga o programa das actividades.

Para cada obradoiro elaborouse tamén unha pequena sinopse cos puntos esenciais que se traballarán:

+ Arteterapia: taller de Arte Katzae. Arte para o benestar.

+ Intelixencia emocional.

+ Educación afectivo-sexual.

Agardamos que a proposta sexa do voso agrado e contamos coa vosa participación.

CONFAPA esixe á Consellería de Educación información sobre as medidas a adoptar respecto dos resultados da Avaliación Final de Primaria 

Venres, 12 de febreiro de 2016

Facémonos eco da postura común das Asociacións de Nais e Pais de Centros públicos de Galicia, representados en CONFAPA GALICIA, que solicitamos á Consellería de Educación información sobre as medidas que se van a adoptar respecto dos resultados da Avaliación Final de Primaria.

Facemos público o texto completo do comunicado  deixando constancia da nosa oposición a estas medidas e a LOMCE na súa totalidade.

+ Consulta a nota de prensa completa.

BO NADAL E FELIZ ANO 2016 

Mércores, 23 de decembro de 2015

A Xunta Directiva da Anpa desexa á comunidade educativa do Castro Baxoi, ás institucións relacionadas e ás entidades colaboradoras, un bo nadal e feliz ano 2016.

*A postal deste ano leva a imaxe dalgúns dos traballos realizados polo alumnado
da actividade de Artes Plásticas con motivo destas datas.

NOVA UBICACIÓN DO COMEDOR 

Domingo, 13 de decembro de 2015

A partir do martes 15 de Decembro, o servizo de Comedor e Mañanceiros deixará de realizarse na Aula de usos múltiples, como se viña facendo ata agora, e terá lugar xusto debaixo desta, nun novo espazo dedicado exclusivamente a este fin. Os pais e nais que deixen ós seus fillos e fillas en Mañanceiros, deberán  baixar polas escaleiras que hai a continuación da secretaría, e unha vez abaixo, á man dereita, localizarase o novo comedor. De todas formas adoptaranse as seguintes medidas a fin de facilitar a nova localización onde:

.- Colocaranse sinais na zona de acceso ó centro, para unha mellor orientación do novo espazo.

.- Os usuarios de Mañanceiros serán chamados e informados  persoalmente por teléfono.

En calquera caso sinalar que as entregas do servizo de Comedor continuarán facéndose no procedemento de sempre. 

Se alguén ten algunha dúbida ó respecto, poderase poñer en contacto coa ANPA.

A Xunta Directiva da Anpa.

MERCADO SOLIDARIO - NADAL 2015 

Eses xoguetes e contos que xa non utilizas, ponos en circulación!

Poñeremos á venda as vosas doazóns e cos cartos que xuntemos faremos unha achega a beneficio de ASANOG (Asociación de axuda a nenos oncolóxicos de Galicia). O material que non se venda destinarase ao colexio.

Recollida de doazóns:

.- Do día 9.12.2015 ao 17.12.2015 (ámbolos dous incluídos): no porche da entrada do colexio haberá un contedor destinado á recollida.

.- Os días 16.12.2015 e 17.12.2015, de 17.00 A 19.00 h., estará aberto o baixo das pistas, debaixo da Escola Infantil.

Puntos de venda:

.- Venres, 18.12.2015, no porche da entrada do colexio.

.- Domingo 20, no feirón municipal.

Anímate e participa!

Desde a ANPA animamos a todas as familias a difundir a iniciativa e participar, na medida das súas posibilidades, nas doazóns e nas compras deste mercado. Tamén solicitamos a colaboración dos vosos peques, de 5º e 6º de primaria, para que, se lles apetece, participen con nós na venda dos artigos.

Colaboran coa ANPA na organización desta actividade:

.- Colexio Público Integrado CASTRO BAXOI.

.- Concello de Miño.

AXUDAS PARA A ADQUISICIÓN DE MATERIAL ESCOLAR 

A Consellería de Educación convoca axudas para a adquisición de material escolar destinadas ao alumnado matriculado en educación primaria, educación secundaria obrigatoria ou educación especial en centros sostidos con fondos públicos para o curso escolar 2015/16. Requisitos: Ser pai/nai/titor ou titora legal do alumnado matriculado en educación primaria, educación secundaria obrigatoria ou educación especial nun centro sostido con fondos públicos durante o curso escolar 2015/16. Ter unha renda per cápita familiar igual ou inferior a 5.400 €. Contía das axudas: 50 € por alumno/a O prazo para presentar solicitudes estará aberto ata o 21 de novembro de 2015. As solicitudes poden tramitarse en https://sede.xunta.es co procedemento ED330F.

Máis información no DOG do 10 de novembro de 2015 e en www.edu.xunta.es.

FESTIVIDADES DO DÍA DO ENSINO E DO DÍA SEGUINTE A TODOS OS SANTOS 

Lembramos a todas as familias que os días 30.10.2015 (venres) e 02.11.2015 (luns) son días non lectivos, fixados no calendario do centro, polo que non haberá clases e tampouco funcionarán os servizos e actividades que desenvolve a ANPA no centro: mañanceiros, comedor nin as actividades extraescolares.

RESULTADOS DA ASEMBLEA XERAL ORDINARIA

O pasado venres 23.10.2015, en segunda convocatoria, celebrouse a Asemblea Xeral Ordinaria, que contou coa asistencia dunhas 27 socias e socios.

Ao longo da asemblea fóronse aprobando por unanimidade cada un dos puntos que figuraban na orde do día da convocatoria: acta da sesión anterior, Memoria de Xestión, informes da Xunta Directiva respecto dos programas de mañanceiros, comedor e extraescolares, informe de participación da asociación no Consello Escolar e proposta de renovación da Xunta Directiva. Foi este último o momento máis emotivo da xornada e no que se puxo de manifesto o agradecemento de todos os asistentes e o recoñecemento da inmellorable labor desenvolvida durante os últimos anos polos membros saíntes da Xunta Directiva. Deste xeito, tanto Concepción González Sarria como Rafael Vázquez Piñeiro, que asistiron á Asemblea, puideron recibir en persoa o cariño das compañeiras e compañeiros da asociación que se fai extensible ao resto de membros da Xunta Directiva que non renovaron este ano a súa participación. Na sección adicada a "Como Participar" desta web pódese consultar como quedou a configuración da nova Xunta Directiva.

Para rematar, en rogos e preguntas, saíron temas como o coidado e mellora  das instalacións, a prevención dos riscos e perigos potenciais no centro ou a necesidade de avanzar na coordinación das actividades extraescolares co resto de clubes e entidades que as propoñen.

NOVO TELÉFONO PARA URXENCIAS 

Xa está en servizo o novo número de teléfono para avisar de incidencias graves ou relativas á recollida ou entrega dos rapaces no servizo de comedor. Poden chamar ao móbil número 661 709 913, que estará activo entre as 14:00 e as 16:00 h.  

Antes de chamar valore a urxencia ou necesidade da chamada, para evitar retrasar o traballo das monitoras.

convocatoria asemblea xeral ordinaria 

Martes, 6 de outubro de 2015

Convócase aos socios/as e ás nais e pais de alumnos do CPI Castro Baxoi á asemblea xeral ordinaria, que se celebrará o venres, 23 de outubro, na sala de usos múltiples do colexio, ás 20:00 na primeira convocatoria e ás 20:30 en segunda convocatoria coa seguinte orde do día:
1.-Lectura e aprobación da acta da asemblea anterior.
2.-Memoria de xestión:

  2.1.- Informe de xestión da xunta directiva: Memoria anual do curso 2014-2015.
   2.2.- Estado de contas do exercicio anterior.

   2.3.-Subvencións e convenios de colaboración da Anpa coas administracións públicas.

3.- Programa mañanceiros e comedor escolar. Informe da xunta directiva.
4.-Banco de libros: Informe da xunta directiva.
5.-Actividades extraescolares: Informe da xunta directiva e aprobación da contía das achegas propostas para o curso 2015-2016.
6.-Participación da Anpa no Consello Escolar.
7.- Renovacións, ceses e nomeamento dos cargos da xunta directiva.
8.- Rolda de intervencións, rogos, suxestións e preguntas.

Miño, 6 de outubro de 2015.
A Secretaria, Gema García Lores
horarios, titorias e normas 2015-2016 

Domingo, 4 de outubro de 2015

Deixamos documento entregado ás familias coa información principal para este curso escolar.

EXTRAESCOLARES DEFINITIVAS 2º AVISO 

Xoves, 1 de outubro de 2015

As actividades que definitivamente organizará a Anpa para o curso 2015-2016 son as seguintes: Obradoiro artes plásticas (os xoves), baloncesto, xadrez, iudo, zumba, combo musical, Nenoos Mini e Nenoos Junior. 

AS ACTIVIDADES COMENZARÁN A PARTIR DO 5 DE OUTUBRO.

Agardamos aos participantes o primeiro día da actividade no recibidor do acceso principal do colexio, para dar a información inicial da actividade.

EXTRAESCOLARES DEFINITIVAS 1º AVISO 

Lúns , 28 de setembro de 2015

Logo da proposta para este curso escolar, unha ver recibidas as solicitudes de inscrición, a xunta directiva confirma que a día de hoxe as actividades que organizará a Anpa son as seguintes: Obradoiro artes plásticas (os xoves), iudo, zumba, combo musical, Nenoos Mini e Nenoos Junior. AS ACTIVIDADES COMENZARÁN A PARTIR DO 5 DE OUTUBRO.

Agardamos ata o vindeiro 1 de outubro para recibir as últiimas inscrición en baloncesto e xadrez, para confirmar a súa continuidade para este curso. Darase información ao remate da semana.

REMATA O PRAZO PARA A INSCRICIÓN NAS EXTRAESCOLARES DA ANPA 

Venres, 25 de setembro de 2015

Recordamos á comunidade escolar que o prazo de inscrición para as extraescolares remata o 25 de setembro. Informarase antes do día 1 de outubro na web das actividades definitivas.

actividades concello 2015-2016 

Martes, 15 de setembro de 2015

Publicamos a oferta de actividades do Concello, da Anpa e doutras entidades para este curso.

proposta extraescolares 2015-2016 

Sábado, 12 de setembro de 2015

Xa é posible a través do formulario de inscrición anotarse nas extraescolares para este curso. Recordade que os formularios se deben entregar na secretaría do centro (que rexistrará a entrega) ou ao correo inscricions@anpacastrobaxoi.org. O prazo de inscrición remata o 25 de setembro.

urxente banco de libros da anpa: e.s.o. 

Xoves, 10 de setembro de 2015

Precísanse libros de 2º e 4º da ESO. As familias poden facer a cesión o xoves, 10 de setembro, de 18:00-19:00, ou o martes, 15 de setembro, de 17:00 a 19:00 h. na aula de inglés do Concello, xunto á Policía Local.

Para a entrega de exemplares ás familias, a Anpa comunicarase por teléfono cos pais ou nais o martes, 15 de setembro, data na que se saberá os exemplares dispoñibles no banco da Anpa para a secundaria.

ABERTO PRAZO MATRÍCULA servizo mañanceiros 

Domingo, 30 de agosto de 2015

Xa se pode facer a reserva de praza para a actividade de Mañanceiros para o curso 2015-2016. Ver folla de mañanceiros nesta web.

BANCO DE LIBROS DA ANPA: recollida de exemplares 

Domingo, 21 de xuño de 2015

Comunícase ás familias que os días para a recollida dos libros prestados ou utilizados no curso 2014-2015 serán os seguintes:

-3º e 4º EP: Martes 23 de xuño, de 17:00 a 20:00 h.

-5º e 6 EP: Mércores 24 de xuño,  de 17:00 a 20:00 h.

-1º e 2º ESO: Xoves 25 de xuño, de 17:00 a 20:00 h.

-3º e 4º ESO: Venres 26 de xuño,  de 17:00 a 20:00 h.

A recollida se fará no local de ingles, nos baixos dos locais municipais de Rabazal, xunto á Policiá Local de Miño.

A Comisión do Banco de Libros da Anpa.

aberto prazo matrícula comedor escolar 

Domingo, 21 de xuño de 2015

A partir do lúns, 22 de xuño, as familias interesadas poderán matricularse no comedor escolar para o curso 2015-2016. A Anpa do Castro Baxoi, o mesmo que a Federación Provincial de Anpas da Coruña, decidiu cambiar a empresa prestadora de servizos, que a partir do vindeiro curso será JARDANAY. Deixamos exemplo de menú do curso 2014-2015.

FESTA DE FIN DE CURSO 2015 

Martes, 16 de xuño de 2015

Achegamos o programa definitivo da FESTA DE FIN DE CURSO para a tarde do vindeiro venres, 19 de xuño, en horario de 16:00 a 19:00 nas instalacións do CPI Castro Baxoi.

A festa incluirá a exhibición das extraescolares: Iudo, xadrez, teatro, baloncesto, combo musical e zumba. Contará coa presencia dun mago profesional e haberá como todos os anos inchables e obradoiros para os mais pequenos.

POLA SEGURIDADE DOS ALUMNOS E ALUMNAS recordamos que para asistir á festa de fin de curso o alumnado deberá estar acompañado dun adulto. 

O alumnado de secundaria poderá acceder ao recinto e sair do mesmo sen un adulto sempre que presente na entrada a autorización firmada polos pais ou titores (pódese utilizar o modelo proposto pola Anpa).

OS ALUMNOS E ALUMNAS QUE NON CUMPRAN ESTA NORMA DE SEGURIDADE NON PODERÁN ACCEDER Á FESTA, PORQUE A ORGANIZACIÓN DISPORÁ DUN CONTROL DE ACCESOS.

MODELO AUTORIZACIÓN ASISTENCIA FESTA

Agradecemos o esforzo e apoio económico para a realización da festa ás entidades colaboradoras

comedor escolar: comida cos escolares 

Mércores, 17 de xuño de 2015

Eurest/Scolarest e a Anpa do Castro Baxoi organizan para o vindeiro xoves e venres, días 18 e 19 de xuño, unha apertura das portas do comedor escolar para que as nais/pais dos escolares asistentes este curso podan comer cos rapaces e observar as instalacións e a dinámica ordinaria do servizo.

As nais ou pais interesados deberán chamar o día anterior ao número de Eurest 981-292422 indicando a data solicitada, o nome do colexio e o da actividade -Portas abertas do Castro Baxoi. (Tamén poden reservar no número 698-160617 en horario de 15:00-16:00 h.). A comida para os pais non terá cargo por xentileza de Eurest.

A Xunta Directiva da Anpa.

FONDO SOLIDARIO DA XUNTA AO CONSELLO ESCOLAR do castro baxoi 

Xoves, 11 de xuño de 2015

Informamos ás familias que, a petición da Dirección do CPI, convocouse unha reunión extraordinaria do Consello Escolar do centro coa finalidade de realizar un manifesto conxunto de toda a comunidade educativa en relación co fondo solidario de libros de texto ordeado pola Consellería de Educación. 

A Xunta Directiva da Anpa defende a volta a o sistema de préstamo universal e gratuito de libros de texto, e non coincide no principal co postulado polo representantes dos docentes (que solicitan o aplazamento por dous anos do fondo solidario, e permitir o cambio de libros de texto que non estean adaptados ao currículo da LOMCE).

Por outra banda temos constancia dun número importante de erros nas listaxes publicadas de nenos e nenas que teñen a obriga de devolver os libros financiados co Cheque que parece indicar a existencia de fallos sistémicos na recollida dos datos e, xa que logo, na validez das listaxes. Como este problema é xeral en toda Galicia, a Anpa procurará ter informados a os socios/as das decisión que no seu caso se tomen desde as Federacións de Anpas sobre este particular asunto.

En canto á colaboración co fondo solidario da Consellería e á futura organización do banco de libros da ANPA, adiantamos ás familias que será a asemblea de socios -que se convocará en breve- a que acorde a folla de ruta a seguir.

Lembramos ás familias de 2º e 4º da ESO que só hai obriga de devolver os libros de texto que foron financiados polo cheque durante este curso. O resto dos libros SON PROPIEDADE DAS FAMILAS.

COMUNICADO DA ANPA AO CONSELLO ESCOLAR

ANPA CASTRO BAXOI INFORMA

exposición de artes plásticas das extraescolares 

Xoves, 11 de xuño de 2015

Pódense contemplar nas instalacións do CPI Castro Baxoi unha mostra dos extraordinarios traballos realizados polos alumnos que asistiron ás extraescolares de Artes Plásticas organizadas pola Anpa.

Parabéns a todos os rapaces e rapazas e á pintora Alicia Fernández que traballóu cos grupos.

BECAS PARA COMEDOR ESCOLAR 2015-2016 

Xoves, 11 de xuño de 2015

Publicóuse no BOP a convocatoria de Becas do Concello de Miño para a asistencia ao comedor escolar para o curso 2015-2016. Os interesados deben pasar polas instalacións do Concello para presentar as solicitudes. O prazo remata o 30 de xuño de 2015.

Bases da convocatoria

Documentación das solicitudes

ANPA CASTRO BAXOI INFORMA

maBANCO DE LIBROS DA ANPA PARA O CURSO 15-16

Domingo, 7 de xuño de 2015

O Banco de Libros da ANPA Castro Baxoi nútrese da vontade solidaria das familias, que ceden os libros adquiridos cos seus cartos á Asociación para a súa reutilización por outras familias.

Tendo en conta que aínda se descoñecen os materiais que se van a utilizar o próximo curso, queremos informar que o Banco de Libros da ANPA seguirá funcionando sempre que conte con textos que se poidan ofrecer ás familias.
Haberá, eso si, que modificar o Regulamento actual, en función das condicións en que poida seguir adiante esta iniciativa solidaria das nais e pais, polo que en breve  seredes convocados en Asamblea Extraordinaria para tal fin.

Todo isto non quita que desde a ANPA Castro Baxoi solicitemos a volta ao sistema de préstamo universal e gratuito dos libros de texto en todas as etapas do ensino obrigatorio.

novo Fondo de libros da xunta

Domingo, 7 de xuño de 2015

Para saber o que dí a Xunta, para solicitar a inclusión no fondo solidario e para coñecer as obrigas das familias que recibiron cheques para adquisición de textos para o curso 14-15, remitimos á web do CPI Castro Baxoi.

Para aclarar o que está pasando e a opinión das Anpas en Galicia, xuntamos novas da prensa, algunha delas moi aclaratoria do que se pretende.

La opinión A Coruña

La Voz de Galicia1

La Voz de Galicia 2

ABC

Deixamos aquí a opinión da Federación de Anpas na que se inclúe a Anpa do Castro Baxoi. 

Tamén estamos observando unha posición especialmente belixerante dos responsables da Consellería neste asunto coas organizacións de nais e pais, en algún caso con contestacións ofensivas non propias de representantes do sector público.

NO CASTRO BAXOI NON HOUBO REVÁLIDA

Sábado, 30 de maio de 2015

As familias de 3º de primaria do CPI Castro Baxoi tomaron cada unha delas a decisión de non enviar aos rapaces a facer a reválida o pasado día 27 de maio. Manifestan así o seu rexeitamento a esta proba que tenta implantar a Consellería de Educación.

Con este grupo de nais e pais estivo informando sobre as reválidas a  presidenta de CONFAPA GALICIA e vocal da Federación Provincial de Anpas de Centros Públicos da Coruña, Helena Gómez Vecino, á que agradecemos o seu esforzo de acudir a Miño coñecendo as obrigas do seu cargo como presidenta das organizacións de nais e pais de Galicia.

reunión informativa reválida 3º ep 

Luns, 18 de maio de 2015

A Anpa do Castro Baxoi informa que mañá martes, 19 de maio, ás 18:00 h., terá lugar unha reunión informativa para as familias en relación á proba de avaliación de 3º de educación primaria prevista para este mes de maio.

Acudirán á reunión Helena Gómez Vecino, (Presidenta de CONFAPA GALICIA e vocal da Federación Provincial de Anpas de Centros Públicos da Coruña), ademais de varios membros da xunta directiva da Anpa de Miño.

Así mesmo, adiantamos un exemplo de xustificación de ausencia para as familias que decidan que os seus fillos ou fillas non acudan á proba prevista pola Consellería.

A Xunta Directiva da Anpa.

ANPA ORGANIZA conferencia sobre alimentación: 14 DE maio 

Domingo, 10 de maio de 2015

A Anpa do Castro Baxoi de Miño organiza un evento didáctico para nais e pais sobre alimentación e nutrición, orientado a dar resposta ás cuestións que máis preocupan ás familias. 

A experta orientará aos asistentes na mellora dos hábitos alimentarios de fillos e fillas, así como na organización das comidas e ceas. Indicará pautas para evitar o "Non me gusta" que tantas veces se repite nas mesas familiares. Tamén dará indicacións para solventar a falta de tempo para preparar comidas saudables, falará dos "alimentos trampa" e dará recomendacións para facer a compra, entroutros temas. Todos os asuntos a tratar terán como principio fundamental o recordatorio de que unha alimentación equilibrada é a base do benestar físico e emocional dos rapeces.

Dirixido a: Nais e pais da comunidade educativa do Castro Baxoi. Nais e pais de Miño e comarca.

Data: Xoves, 14 de maio, de 18:00 a 20:00 h.

Lugar: CPI Castro Baxoi, Miño. Aula de usos múltiples.

Ponente-relatora: Rosa López. (Experta en nutrición e planificación dietética, Coach nutricional)

HABERÁ MONITORES PARA FACER XOGOS COS RAPACES MENTRES OS ADULTOS ASISTEN Á CONFERENCIA.

Entrada libre. Non se precisa confirmar asistencia.

proba de avaliación, 3º de primaria 

Domingo, 10 de maio de 2015

Nos próximos días terá lugar por primeira vez a reválida de 3º EP, pola aplicación da lei Wert en Galicia. En relación a esta proba, a Xunta Directiva da Federación Provincial de Anpas (e a Xunta Directiva da Anpa do Castro Baxoi que ten a mesma opinión neste asunto) descoñecen os fins e as consecuencias da mesma, -que a Consellería non acaba de aclarar- polo que poñemos a disposición das familias o modelo de solicitude para que a dirección educativa que teña competencia para contestar o faga ás familias antes da realización da mesma. 

A Anpa preguntou sobre o asunto no último Consello Escolar e se respostou que nese momento se descoñecían as consecuencias da proba no futuro. En calquera caso, a Dirección do centro afirma que, segundo a información de que dispón a dia de hoxe, serán as avaliacións ordinarias - e non ésta- as que determinen a evolución dos alumnos nos cursos.

En canto á asistencia á proba, nos confirma á dirección do colexio que no caso de ter decidio non asistir, será necesario xustificar a ausencia como calquera día lectivo que se falta ás clases.

A Xunta Directiva da Anpa.

ANPA ORGANIZA fin de semana da familia nas terras do deza: 25-26 de abril 

Domingo, 15 de marzo de 2015

A Anpa do Castro Baxoi de Miño organiza e cofinancia, por primeira vez, unha fin de semana cultural e recreativa fora da nosa comarca, cunha planificación de actividades culturales e de lecer pensadas para ter un divertido e diferente fin de semana en familia, en comunidade e a un prezo axeitado. 

Dirixido a: Familias do CPI Castro Baxoi (Nais, pais, escolares, profesorado ou persoal non docente. Familias de entidades colaboradoras coa Anpa.

Datas: Das 10:30 h. do sábado 25 de abril ás 19:00 h. do domingo 26 de abril.

Lugares: Comarca do Deza, segúndo programa previsto.

 

Prezos: Nenos infantil ou primaria: 50.00 €; Adultos e secundaria: 60.00 €; Menores de tres anos: Gratuito agás o uso dos servizos de restauración nas comidas do mediodía (15.00 €).

Incúe: Transporte en bus, seguro de accidente, acceso a todas as actividades, museos ou monumentos, todas as comidas e aloxamento segúndo especificacións do programa.

Inscricións: Do 16 de marzo ao 15 de abril. Se deberá cubrir o formulario e seguir as instruccións.

Ver PROGRAMA COMPLETO con links aos lugares.

ANPA ORGANIZA OBRADOIRO SOBRE DISCIPLINA POSITIVA 

Domingo, 15 de febreiro de 2015

A Anpa do Castro Baxoi de Miño organiza un obradoiro en tres sesións sobre disciplina positiva. O obradoiro está dirixido ás nais e aos pais do Castro Baxoi, ou outros interesados de Miño e comarca.

Lugar: CPI Castro Baxoi, Miño. Aula de usos múltiples.

Datas das sesións: 26 de febreiro, 26 de marzo e 30 de abril. (últimos xoves de cada mes)

Horario: De 19:00 a 21:00 h.

Ponentes/Adestradoras de nais e pais: María Soto e Bibiana Infante (certificadas pola Positive Discipline Association).

Prezo do obradoiro completo (6 horas): Socios: 3.00 €/familia. Non socios: 30.00 €/familia. A contía total entregarase o 26 de febreiro no acceso á sala.

Inscricións: Indicar o nome e apelido dos asistentes ao correo electrónico da Anpa Castro Baxoi, ou por teléfonono ao nº 682-321886. Anotaranse as inscrición por orde de chegada ata un máximo de 30 familias. Prazo de inscrición ata o mércores 25 de febreiro.

ANPA O CARREGAL ORGANIZA RELATORIO SOBRE COMUNICACIÓN COS ADOLESCENTES 

Domingo, 25 de xaneiro de 2015

A Anpa O Carregal, do IES Francisco Aguiar de Betanzos, organiza unha actividade sobre a "Comunicarse con fillos/as adolescentes: Un mundo diferente", da que nos dan traslado invitando á asistencia ás nais e pais do Castro Baxoi de Miño.

RELATORA: Nuria Martínez (Psicóloga de AZOS)
DATA: Sábados 7 e 21 de febreiro (2,5 h/día)
HORARIO: 17:30 a 20:00
LUGAR: Libraría BIBLOS

Asistencia gratuíta. Remitir confirmación de asistencia ao correo: anpaocarregal@gmail.com

PREVISIÓN DE EVENTOS DIDÁCTICOS PARA NAIS E PAIS ORGANIZADOS POLA ANPA CASTRO BAXOI 

Domingo, 15 de febreiro de 2015

A Xunta Directiva da Anpa está a traballar na organización dos seguintes eventos didácticos para o que queda de curso académico:

*TDAH: Información técnica para nais e pais sobre o trastorno de atención e hiperactividade. Xa realizado.

*Obradoiro sobre disciplina positiva: Últimos xoves dos meses de febreiro, marzo e abril.

*Asesoramento nutricional práctico para as familias: Pendente data.

*Cómo funciona un colexio: Organización académica, avaliacións dos alumnos, dereitos e obrigas dos pais e profesores, etc: Pendente data.

*Papel da familia no desarrollo infantil e xuvenil: Qué facer e non facer os pais e nais. Pendente data.

tdah: conferencia de orientación ás familias no castro baxoi 

Domingo, 18 de xaneiro de 2015

O vindeiro venres, 23 de xaneiro, de 19:00 a 20:30 na aula de usos múltiples do CPI Castro Baxoi de Miño, terá lugar unha actividade de orientación ás familias sobre o trastorno por déficit de atención e hiperactividade (TDAH) organizada pola ANPA CASTROBAXOI, e impartida por técnicos da asociación ANHIDA CORUÑA.

A entrada é libre ata completar aforo.

Anpa Castro Baxoi Informa.

BO NADAL E FELIZ ANO 2015 

Domingo, 21 de decembro de 2014

A Xunta Directiva da Anpa desexa á comunidade educativa do Castro Baxoi, ás institucións relacionadas e ás entidades colaboradoras, un bo nadal e feliz ano 2015.

NOVAS MATRÍCULAS PARA 2º E 3º TRIMESTRE 

Domingo, 21 de decembro de 2014

Ás familias que aínda non realizan actividades extraescolares organizadas pola Anpa, lembrámosvos que podedes tramitar novas matrículas para o 2º e 3º trimestre deste curso.

Ver actividades.

Formulario inscrición.

RENOVACIÓN DO CONSELLO ESCOLAR 

Xoves, 4 de decembro de 2014

Finalizadas as eleccións á renovación parcial do consello escolar do Castro Baxoi, publicamos a composición definitiva do mesmo para os vindeiros dous anos.

Debemos salientar a elección de Susana Souto como nai elixida nestas eleccións, nas que quedóu como suplente Francisco Bustabad.

Como representante da Anpa no cosello, mantense Conchi González. 

Anpa Castro Baxoi Informa.

CONSULTA CIDADÁ ENTRÉGASE NO MEC 

Domingo, 16 de novembro de 2014

A Plataforma pola Escola Pública ven de entregar 1.8 millóns de papeletas no rexistro do Ministerio de Educación, no que se recolle a opinión do colectivo rexeitando os recortes e a impalantación da Lomce. A consulta cidadá fíxose o pasado curso. A chegada das papeletas forzóu a primeira reunión de responsables coa Plataforma, sen cambios de actitud por parte dos xestores.

Ver comunicado

HORARIO DAS ELECCIÓNS AO CONSELLO ESCOLAR: 

Luns, 24 de novembro de 2014

RENOVACIÓN PARCIAL DO CONSELLO ESCOLAR DO CPI de miño

Domingo, 16 de novembro de 2014

O vindeiro 25 de novembro terá lugar a votación para a elección de un dos representantes das nais e pais no consello escolar do Castro Baxoi para os próximos catro anos.

Co apoio da Anpa preséntanse nesta ocasión: Susana Souto Gómez, para a que pedimos o voto; Francisco Bustabad Anido: Preséntase como suplente; Manuel Lores Puente: Preséntase como suplente.

Máis información sobre o Consello escolar aquí.

¡¡¡¡¡Participa!!!!!

anpa renova convenio con concello de miño 

Domingo, 12 de outubro de 2014

O pasado 6 de outubro firmóuse un novo convenio de colaboración do Concello de Miño coa Anpa Castro Baxoi, polo que o Concello achega 2.000 €, sempre que sexan debidamente xustificados, para as actividades propias da Asociación.

Queremos agradecer á corporación municipal a súa sensibilidade co colexio e cos pais e as nais, e agardamos que ano tras ano estas contías poidan incrementarse para ben dos rapaces e familias de Miño.

ÉXITO DO BANCO DE LIBROS DA ANPA 

Domingo, 12 de outubro de 2014

Un ano máis podemos dicir que a organización do Banco de libros da Anpa do Castro Baxoi foi un éxito. Deixamos aquí as estatísticas e a comparativa co curso anterior.

A xunta directiva quere agradecer especialmente aos membros da comisión do banco de libros, que colaboraron con moitas horas de esforzo nesta actividade. Grazas de novo.

ANPA CASTRO BAXOI INFORMA

abrazo solidario en defensa do ensino público 

Lúns, 7 de outubro de 2014

Dado o escenario actual derivado dos recortes continuados no ensino público e a atropelada implantación da LOMCE, animámosvos a participar nesta SEMANA EN DEFENSA DO ENSINO PÚBLICO, nos actos simbólicos que se están a facer. Agradeceríamos a vosa participación nun breve acto común, duns 20 minutos de duración, que consistirá nun abrazo simbólico a un centro público da provincia, neste caso ao CEIP Rosalía de Castro, Río Avía, s/n - 15007 A Coruña, o martes 7 de outubro ás 18:00 h.

Ver comunicado Ver Cartaz

inicio das actividades extraescolares 

Domingo, 6 de outubro de 2014

A partir do lúns, 6 de outubro, comezarán as actividades extraescolares organizadas pola Anpa do Castro Baxoi.

EXTRAESCOLARES DEFINITIVAS: NOVIDADES 

Lúns, 29 de setembro de 2014

Confirmamos que coas últimas inscricións, foi posible xuntar un grupo para facer a actividade "NENOOS-MINI", para alumnado de infantil.

A totalidade das actividades serían:

Baloncesto, iudo, zumba, ioga, artes plásticas (prazas limitadas), xadrez, teatro, Nenoos 5-8 anos e de 8-12 anos, Nenoos-Mini (infantil) e combo musical (prazas limitadas). 

plásticas e combo musical: NOVIDADES 

Mércores, 1 de ooutubro de 2014

En relación coas actividades extraescolares con límite de plazas, comunícase:

Artes plásticas: Con motivo de procurar que todos os solicitantes poidan facer a actividade, convócanse expresamente ás nais e pais dos rapaces inscritos a unha reunión o xoves 9 de outubro, ás 16:00 h. no CPI para ver as posibilidades de facer outro grupo os martes de 4 a 6 da tarde. De non chegar a un acordo se limitará por orde de inscrición ás dez primeiras solicitudes recibidas.

Combo musical: O mércores 1 de outubro, publicarase no tabuleiro da Anpa do CPI a listaxe dos alumnos que, segundo a orde de inscrición, teñen praza nesta actividade para este curso.

publicado o calendario escolar do castro baxoi 

Domingo, 28 de setembro de 2014

Foi aprobado polo consello escolar o calendario definitivo para este curso.

Ver aquí.

ANPA CASTRO BAXOI INFORMA

extraescolares definitivas 

Domingo, 28 de setembro de 2014

Foron revisadas pola secretaría da Anpa a totalidade das inscricións, e podemos confirmar que as actividades extraescolares que se van organizar este curso son:

Baloncesto, iudo, zumba, ioga, artes plásticas (prazas limitadas), xadrez, teatro, Nenoos 5-8 anos e de 8-12 anos, Nenoos-Mini (infantil) e combo musical (prazas limitadas). 

Ver aquí o calendario.

As familias interesadas aínda poden entregar as inscricións. Os non inscritos que dubiden e que queiran probar unha actividade poden facelo nas dúas primeiras sesións, mandando previamente un correo á Anpa.

As listaxes definitivas dos grupos con prazas limitadas e as instruccións para o primeiro día se publicarán ao longo da vindeira semana.

As actividades comezarán a partir do 6 de outubro.

ANPA MIÑO CPI CASTRO BAXOI INFORMA

AXUDAS DO MINISTERIO PARA ALUMNOS CON NECESIDADES ESPECIAIS 

Domingo, 28 de setembro de 2014

Publicouse no BOE a convocatoria de axudas para alumnos con necesidades de apoio educativo. O plazo para a tramitación de solicitudes remata o 30 de setembro.

Ver aquí.

ANPA CASTRO BAXOI INFORMA

CONVOCADA ASEMBLEA XERAL ORDINARIA 

Domingo, 28 de setembro de 2014

Convócase aos socios/as e ás nais e pais de alumnos do CPI Castro Baxoi á asemblea xeral ordinaria, que se celebrará o martes, 14 de outubro, na sala de usos múltiples do colexio, ás 20:30 na primeira convocatoria e ás 21:00 en segunda convocatoria. Ver convocatoria coa orde do día.

ANPA CASTRO BAXOI INFORMA

OFERTA DE ACTIVIDADES CONCELLO E ANPA

Martes, 9 de setembro de 2014

Xa está lista o oferta de actividades do Concello, que tivo a cortesía de publicalas xunto coas da Anpa. 

Ver aquí todas as actividades. 

ANPA MIÑO CPI CASTRO BAXOI INFORMA

AVISO IMPORTANTE

Domingo, 21 de setembro de 2014

Este curso, todas as familias deberán renovar o documento de inscrición/modificación de datos, indicando o número de conta no formato IBAN para cumprir a normativa SEPA. Xuntamos neste correo arquivo co formulario, que se usa tamén para a inscrición nas extraescolares. As familias que no curso 2013-2014 eran socias da Anpa seguirán asociadas agás que tramiten a baixa antes do 30 de setembro. 

A data límite de entrega do formulario de inscrición para asociarse e para as extraescolares é o venres, 26 de setembro. O luns, 29 de setembro, coñeceránse a través da web, as actividades definitivas.

anpa modifica o plan educativo do centro 

Sábado, 11 de setembro de 2014

A proposta aprobada pola asemblea da Anpa do pasado outubro agromóu, e podemos dicir que o Consello Escolar do Castro Baxoi reunido en xuño de 2014 aprobou a modificación do Plan Educativo do Centro nos seguintes termos:

"O Director presentou ao Consello a proposta de inclusión de 5 puntos no PEC, presentada pola ANPA.

1.- Compromiso con avanzar no traballo transversal para mellorar as competencias emocionais dos nenos a través de toda a comunidade educativa. (reforzar a formación aos educadores se fixese falta).

2.- Compromiso coa participación dos pais e nais: Voz e voto dos pais e nais nos órganos de representación.

3.- Compromiso con facilitar a conciliación da vida laboral e familiar, en relación a aspectos de intervención educativa en coeducación, igualdade de oportunidades e atención á diversidade. 

4.- Compromiso para estimular que os docentes poidan ofrecer Información sobre as aprendizaxes e a súa metodoloxía ás familias de xeito aberto e transparente.

5.- Compromiso para ofrecer un espazo definido para o estímulo da creatividade fora da organización curricular xa establecida.

O Consello aprobou que se inclúan estas modificacións no Proxecto Educativo de Centro.

ANPA MIÑO CPI CASTRO BAXOI INFORMA

INSCRICIÓN Á ANPA CURSO 2014-2015

Domingo, 7 de setembro de 2014

Recordamos que:

-As familias que no curso 2013-2014 eran socias da Anpa, seguirán asociadas agás que tramiten a baixa antes do 30 de setembro.

-Moi importante: Este curso, todas as familias deberán renovar o documento de inscrición/modificación de datos, indicando o número de conta no formato IBAN para cumprir a normativa SEPA.

 Ver formulario de inscrición/baixa/modificación 

ANPA MIÑO CPI CASTRO BAXOI INFORMA

anpa miño na federación provincial

Domingo, 7 de setembro de 2014

Anpa CPI Castro Baxoi, na persoa da súa presidenta, Fátima Babío, xa está presente como vocalía na nova xunta directiva da Federación Provincial de Anpas de Centros Públicos de a Coruña, que agrupa a 300 entidades da provincia.

Agardamos que a nova xunta, presidida por Daniel Cameselle, logre os obxetivos propostos, e animamos a Fátima a levar a cabo a nova tarefa co apoio de todos os socios e socias do Castro Baxoi.

ANPA MIÑO CPI CASTRO BAXOI INFORMA

aberta a matrícula para mañanceiros

Martes, 2 de setembro de 2014

Xa temos listo o formulario de matrícula e a organización do programa de "Mañanceiros" para o curso 2014-2015. Ver aquí. 

ANPA MIÑO CPI CASTRO BAXOI INFORMA

BANCO DE LIBROS CONVOCATORIA SETEMBRO

Luns, 1 de setembro de 2014

Os horarios de entrega e recollida de libros para o curso 2014-2015 na convocatoria de setembro serán os seguintes:

Recollida: Martes, 9 de setembro, de 9:00 a 14:00 horas no centro escolar.

Entega: Xoves, 11 de setembro de 9:00 a 14:00 horas no centro escolar.

PROPOSTA DAS EXTRAESCOLARES DA ANPA PARA O CURSO 2014-2015

Venres, 22 de agosto de 2014

Adiantamos a proposta de actividades extraescolares para o curso 2014-2015. Ver aquí.

ANPA MIÑO CPI CASTRO BAXOI INFORMA

BECAS DO CONCELLO AO COMEDOR ESCOLAR E PARA LIBROS DE TEXTO

Mércores, 13 de agosto de 2014

O Concello de Miño publicou as bases para a convocatoria de axudas para o comedor escolar e libros de texto para o curso escolar 2014-2015. O prazo para presentar as solicitudes para o comedor remata o día 23 de agosto, e o das becas para libros de texto, o 25 de agosto.

Nas instalacións do Concello en Rabazal teñen os impresos e as bases para as convocatorias. 

ANPA MIÑO CPI CASTRO BAXOI INFORMA

aberta a matrícula para o comedor escolar 

Domingo, 22 xuño de 2014

As familias interesadas xa poden inscribirse no comedor escolar para o vindeiro curso.

En previsión da próxima convocatoria de axudas do Concello, recomendamos ir matriculándose para ter este requisito cumprido.

Para matricularse ver aquí:

ANPA MIÑO CPI CASTRO BAXOI INFORMA

grazas por participar 

Domingo, 22 de xuño de 2014

A todos os participantes na festa de fin de curso do pasado xoves, GRAZAS POR VIR E DISFRUTAR.

A Xunta Directiva agradece expresamente ao equipo directivo do colexio, os profesores participantes, ás entidades e particulares colaboradores, e especialmente aos membros da comisión de extraescolares que traballaron para facer unha tarde distinta de convivencia e xogos.

ANPA MIÑO CPI CASTRO BAXOI INFORMA

apertura banco de libros 2014-2015 

Mércores, 18 de xuño de 2014

Desde a ANPA Castro Baxoi queremos recordarvos a existencia do Banco de Libros que funcionará con normalidade, e segundo o Regulamento existente, para o curso 2014-2015.

O principal cambio na dinámica de recollida e entrega de materiais consistirá en que tanto a devolución dos préstamos como a cesión de libros polas familias este curso farase en man, desde o 23 ata o 27 de Xuño, nas instalacións do CPI, en horario de 9 a 14 horas.

Nese momento poñeremos á vosa disposición a documentación que teñades que cubrir, incluído o formulario de actualización de datos para familias asociadas.

A entrega de textos para o vindeiro curso producirase entre os días 3 e 8 de Xullo (como norma xeral), mais en horario de 10 a 13 horas, tamén no propio CPI.

Para calquera dúbida quedamos á vosa disposición no teléfono da Anpa ou no correo bancodelibroscastrobaxoi@gmail.com

festa de fin de curso 

Sábado, 14 de xuño de 2014

O vindeiro xoves, 19 de xuño, a partir das 16:00 h, terá lugar a Festa de Fin de Curso organizada pola Anpa e o profesorado.

Haberá actividades ata as 18:00. A partir desa hora darase a merenda aos escolares asistentes.

Estades todos invitados!!!!

Ver programa

Recordade que o venres 20, haberá clase normal de 9:00 a 14:00, e se manterán os servicios de mañanceiros e comedor.

ANPA MIÑO CPI CASTRO BAXOI INFORMA

agradecemento a todos os colaboradores

Sábado, 14 de xuño de 2014

A Xunta Directiva quere agradecer a contribución de todas as entidades, empresas e particulares colaboradores que fan posible a realización da festa de fin de curso. Ver COLABORADORES. 

Tamén queremos salientar o esforzo dos membros da Comisión de extraescolares da Anpa e do equipo directivo do centro. 

Grazas a todos.